第五十五回 订婚约即席意彷徨 掩私情同房颜忸怩

然耐故歇说得蛮高兴，耐转去仔，屋里倒勿许耐，阿是耐要间架哉嗄？耐索性说明白仔，倒也无啥。”三公子皇然起立，道：“耐阿是勿相信我？”二宝一手捺坐，笑道：“勿是我匆相信耐，我为仔阿哥勿挣气，无法子做个倌人。自家想：陆里再有啥好结果？耐要讨我做大老母，故是我做梦也想勿到实概个好处。不过耐屋里有仔个大老母，故歇再讨个大老母转去，好像人家勿曾有过歇。（要勿）晚歇忒起劲仔，倒弄得一场空。”三公子安慰道：“耐放心，倘然我自家想讨三房家小，故末常恐做勿到；故歇是我嗣母个主意，再要讨两房，啥人好说声闲话？索性搭耐说仔罢，嗣母早就看中一头亲事来浪，倒是我搭个浆，勿曾去说。难转去末就请媒人去说亲，说定仔，我再到上海接耐转去，一淘拜堂。不过一个月光景，十月里我定归到个哉。耐放心！”

二宝听说，不胜欢喜，叮咛道：“价末耐十月里要来个囗。耐去仔，我一干子来里，勿出门口，勿见客人，等耐来仔末，我好放心。耐（要勿）为啥事体多耽搁仔噢。倘然耐屋里个夫人匆许耐讨，耐就讨我做小老母，我也就哝哝末哉。”

二宝说到这里，忽然涕泪交颐，两手爬着三公子肩膀，脸对脸的道：“我是今生今世定归要跟耐个哉，随便耐讨几个大老母，小老母，耐总（要勿）豁脱我。耐要豁脱仔我是……”一句话说不完，噎在喉咙口，“呜呜”的竟要哭。慌得三公子两手合抱拢来，搂住二宝，将自己手帕子替他轻轻揩拭，一面劝道：“耐瞎说个啥嗄！耐故歇末该应快快活活，办点零碎物事，舒齐舒齐。耐倒再要哭，真真勿着落！”

二宝趁势滚在三公子怀中，缩住哭声，切切诉道：“耐勿晓得我个苦处，我拨乡下自家场花人说仔几几花花邱话，故歇说是耐要讨我去做大老母，俚哚才匆相信，来浪笑；万一勿成功下来，我个面孔搁到陆里去！”三公子道：“再有啥勿成功？除非我死仔，故末勿成功。”二宝火速抬身，一把握了三公子的嘴，道：“耐阿要无清头，难勿搭耐说哉。”三公子一